ENKSê: Kiryarên çekdarên PYDê rê ji şerekî navxweyî re divekin

Encûmena Niştimanî Kurdî li Sûriyê (ENKSê) îro Yekşemê daxuyaniyek belav kir, tê de êrîşa hêzên Asayîşa Rêveberiya Xweser li ser gundê Bana Şikeftê li derdora bajarê Dêrikê şermezar kir, û hişyariya şerekî navxweyî di çarçoveya berdewamiya van kiryaran de destnîşan kir.

Di daxuyaniya ENKSê de hat ku, komek ji çekdarên girêdayî Partiya Yekîtiya Demokratîk (PYDê) ku bi dehan ji tirimbêlan û bi sedan ji çekdaran pêk dihatin, hejmarek mezin ji wan endamine Ereb bûn, bi bihaneya leşkeriya neçar êrîşî gundê Bana Şikeftê yê li derdora Dêrikê kirin, û şêniyên gund ji hêla xwe ve li berxwe dan lewra çekdarên PYDê ew gulebarandin, di encamê de 3 welatî birîndar bûn, û 3 yên din hatin binçavkirin, û piştî pevçûnan bo çend demjimêran, çekdarên êrîşker neçar bûn ku bi paş ve vekişin û hêj rewş li wê deverê ne aram e.

ENKSê di daxiyaniya xwe de ew êrîş şermezar kir û got ku, kiryarên bi vî rengî rê ji şerekî navxweyî re divekin, herweha ji hemû hêzên Kurdistanî û yên navwelatî ligel rêxistinên mirovane daxwaz kir da destêwerdanê bikin û kiryarên PYDê rawestînin, jiber ev kiryar berovajî mafên mirovan in û azadiyê binpê dikin.