ENKSê: Gelê Kurd li Kurdistana Sûriyê bangewaziya me pêk anî

Encûmena Niştimanî ya Kurdî li Sûriyê (ENKSê) daxuyaniyek belav kir, tê de tekez kir ku gelê Kurd li Kurdistana Sûriyê li pişta wê ne û dê di xebata xwe de berdewam bin tevî hemû kiryarên Partiya Yekîtiya Demokrat (PYDê) li dijî wan.

Di daxuyaniya ENKSê de hat ku, li ser bangewaziya wan û da şermezarkirina xwe ji kiryarên PYDê re diyar bikin, bi hezaran ji gelê Kurd li hemû bajar û bajarokan daketin kolanan û sembolên li dijî siyasetên PYDê hildan, bitaybetî binçavkirina bi dehan ji endam û serkirde yên ENKSê û pêkanîna fişarê da ew tenê desthilatê li herêmên Kurdî bike.

Daxuyanî amaje kir ku, tevî şêweyê şaristanî yê ku xwepêşandan û mangirtin ên alîgirên wan xuya kirin, lê çekdarên PYDê dîsa bi dehan ji welatiyan binçav kirin û berê wan dan zindanan.

Di dawiya daxuyaniya ENKSê de hat ku, tevî hemû kiryarên tund derheqê wan de,lê gelê Kurd daketin kolanan û ev tê wateya ku dê di xebata xwe de berdewam bin li dijî siyasetên yekalî ji hêla PYDê ve, herweha ji hemû hêzên Kurdistanî û navwelatî daxwaz kirin da fişarê li ser PYDê bikin û hemû girtiyan ji zindanên xwe serbest berde.